မမနှင့် လိုက်ကြမလား
============ မောင်ဦး
ယနေ့ မမရဲ့ ကောင်းသတင်းလေး တပုဒ်ကြောင့် ကျုပ်အရမ်းပျော်နေတယ်ဗျာ။
ဒီသတင်းကြောင့် ကိုယ့်ရပ်ရွာကိုလည်း အခွင့်သာလျှင် အခေါက်ခေါက် အခါခါ ပြန်ခွင့်သာစေ တော့မယ်ပေါ့။
ဒါကြောင့်လည်း စိတ်ချမ်းသာတယ်။
တွေးမိတိုင်းကြည်နူးတယ်။
အဲဒီသတင်းက မန္တလေးမြို့မှ ကောလင်းမြို့ ကို ယနေ့ ဇူလိုင်လ ၁ ရက်နေ့မှစတင်ပြီး အထူးအမြန်ရထား RBE တိုက်ရိုက် စတင်ပြေးဆွဲတော့မည် တဲ့။
ဒီသတင်းကို ကြားသိရတာနဲ့ ကျုပ် အရမ်းဝမ်းသာ ကြည်နူးမိတယ်ဗျာ။
၀မ်းသာသည့် အကြောင်းကို ပြောမပြ တတ်အောင်ပါဘဲဗျာ။
ဘာဖြစ်လို့လည်း ဆိုတော့ ကျုပ်က ကောလင်းသား လေဗျာ။
မောင်ဦး ကောလင်း ဆိုတာ ကျုပ်ပေါ့။
ကျွန်ုပ်တို့ ကောလင်းမြို့ကို နာမည်ကျော်တဲ့မြို့အဖြစ် လူတိုင်း သိကြပါတယ်။
၂၀၁၅ မဲပေးချိန် -- ပါတီကိုယ်စလှယ် မဲ ဇီးရိုးဖြစ်စေတဲ့မြို့။
သူဌေး သူကြွယ်ပေါများပြီး ရေလျှံ မြို့အဖြစ် လူသိများတဲ့မြို့ ။
ရေလျှံတယ်ဆိုတာ သဘာဝ ရေဘေးဒါဏ် အခံရဆုံးမြို့ ဆိုလိုတာပါ။
တကယ့် တကယ်တော့ ကျုပ်တို့ ကောလင်းဟာ တန်ဘိုးရှိတဲ့ သဘာဝ
တောတောင်တွေ သစ်တောတွေ ပတ်လည် ဝိုင်းပြီး ဆန်ရေစပါး
ဟင်းသီး ဟင်းရွက် သားငါး ရွှေသတ္တူ သစ်တောထွက်ပစ္စည်းမျိုးစုံ
များစွာ ထွက်ရှိရာ မြေပြန့်မြို့ လေးတစ်မြို့ဖြစ်ပါတယ်။
အသစ်ရောက်လာသော ၀န်ထမ်းတိုင်း မောင်ကြီး မပြန်နိုင်ဖြစ်ကြတယ်။
ရှမ်း ဗမာ ဓနု ကချင် လူမျိုးလည်းစုံပါတယ်။
ချစ်စရာ ဖြူဖြူ ဝဝ ကစ်ကစ်ပျိုပျို အိုအို စကားဝဲတဲ ဝဲတဲတွေလည်း ပေါမှပေါတဲ့မြို့ဗျ။
ဟိုး--ယခင့် ယခင်နှစ်ကြာမြင့်ချိန်က ကောလင်းရေကြီးမှုဟာ ငါးနှစ် တကြိမ် ဆယ်နှစ်တကြိမ်သာ ဖြစ်ခဲ့သည့် မြို့ပါ။
နောက်တော့ သိတဲ့ အတိုင်း ကောလင်းရေကြီး ရေလျှံမှုဟာ ခတ်စိတ်စိတ်ဖြစ်လာတယ်။
ဖြစ်မှာပေါ့ ။ မဲမဲမြင်ရာ ရောင်းစား သုတ်စားတဲ့ သူခိုးကြီး သူခိုးလေးများရဲ့စနစ်ဆိုးတွေ ကြောင့်ပေါ့။
ဘေးပတ်ဝန်းကျင်းမှာရှိ သစ်တောတွေ အပြောင်ရှင်း ။
ရွှေသတ္တူ တွေရှိတဲ့ ချောင်းမြောင်းတွေ ပရမ်းပတာကျင် ။
သဘာဝဆိုးကျိုးရဲ့ အတိမ်အနက်ကိုမသိ လုပ်ပိုင်ခွင့်တွေ
ပရမ်းပတာချပေး။
နောက်ဆုံးချောင်းပိတ် မြောင်းပိတ်နဲ့ ရေစီး ရေလာ ပျက်ပြီး။
နောက်ဆုံး မိုးရွာလျှင် ကောလင်း ရေလျှံတော့တာပါဘဲ။
ကျုပ်တို့ကောလင်းဟာ လူဦးရေထူထပ်ပြီး စီးပွားရေးလုပ်ငန်းများ
ကောင်းမွန်သောဒေသ ဖြစ်သည်နှင့် အညီ ခရီးသွားလာမှု များပြားပြီး
ရထားလမ်းဖြင့်သာ အားပြု သွားလာနိုင် သောဒေသ ဖြစ်ပါတယ်။
ယခု နောက်ပိုင်းမှသာ ကားလမ်းက အနည်းအငယ် ကောင်းလာလို့ ကား
စီးတဲ့ သူများလာတာပါ။
မန္တလေးမြို့သို့ ရထားစီးပြီးသွားမည်ဆိုလျှင် မြစ်ကြီးနားမှလာသော ရထားကိုသာ တဆင့်ခံ စီးရပါတယ်။
တဆင့်ခံ စီးရသည်နှင့် အညီ ထိုင်ခုံနေရာ ရရှိဘို့က ရေရာ မသေချာပါဘူး။
ဟိုး အလောင်း လောင်းဂိုး ကဆိုလျှင် ရထားလက်မှတ်က ဘုရား
ချေး(ချီး )ထက် ရှားသလို ကြေးကြီးကြီးနဲ့ မှောင်ခိုဈေးကွက်ကပင်
ဝယ်၍ စီးရသော အခက်အခဲများ ရှိခဲ့ပါတယ်။
အဲဒါကြောင့် ထိုင်ခုံရရန်သေချာတဲ့ ကားကို စီးကြတာ များပါတယ်။
ကားစီးပြန်တော့လည်း ကားခက မသက်သာ။
ရန်ကုန် မန္တလေး ရဲ့ခရီးမိုင် တဝက်ပင်မရှိသည့် မန္တလေး- ကောလင်း
၁၅၀မိုင်ခရီးကို ကားခ ၈၀၀၀ိ/ မှ ၁၂၀၀၀ိ/ ပေးစီးရပါတယ်။
ရန်ကုန် မန္တလေး မိုင်၃၈၀ကျော် ခရီးကို ကားစီးသွားတဲ့ ခရီးသည်များ
အနေဖြင့် ကားပိုင်ရှင်များကို လမ်းကြုံလျှင် ထမင်းခေါ်ကျွေးသင့်ပေသည်။
ကောလင်း- မန္တလေး ကားစီးချိန်က ၇ နာရီခွဲမှ ၈ နာရီ အထိကြာပါတယ်။
ကောလင်း-မန္တလေး ကားလမ်းက ရန်ကုန် မန္တလေးလမ်းလို အခြားမြို့ကြီးများသို့ သွားလာသည့် ကားလမ်းတို့လို ကျယ်ဝန်းပြီး ချောမွတ်သော လမ်းမျိုးတော့ မဟုတ်ဘူးခင်ဗျ။
ရွှေဘိုမရောက်ခင်အထိ ကားလမ်းက ကျဉ်းရသည့် အထဲ ကျင်းချိုင့်များကလည်း ထုနှင့်ဒယ်ဆိုပါတော့။
အဲဒီလိုလမ်းမျိုးမှာ ကားစီးရသည့် အရသာကို စဉ်းစားသာကြည့် ခံစားပေးပါတော့ ဗျာ။
ယခု ကောလင်း နှင့် မန္တလေးကို တိုက်ရိုက် ရထားဖြင့် အချိန်တိုတို ဈေးနှန်းသက်သာသာနှင့် ပြေးဆွဲမည် ဆိုတော့ ကျုပ်တို့လို နယ်သူ နယ်သားတွေ အတွက် အရမ်းဝမ်းသာရပြီပေါ့။
ယခု အထူးအမြန် RBE ရထားစီးမည်ဆိုပါက အချိန် ၇နာရီနှင့် ရောက်ရှိကာ ရထား လက်မှတ်ခက ၄၀၀၀ကျပ်ဘဲ ကုန်ကျမည် ဖြစ်ပါတယ်။
ရထားတွဲများက ယခုမှ စက်ရုံမှထွက်လာသည့် အသစ်စက်စက်တွဲများ ဖြစ်သည်ဟု ဆိုသည်။
အထက်တန်းတွဲ အထက်တန်းထိုင်ခုံ ဆိုတော့ ငြိမ့်ငြိမ့်ညောင်းညောင်း သက်တောင့် သက်သာနဲ့ စီးရမယ်။
လမ်းမှာ ကားစီးရသလို အပေါ့အလေးကိစ္စ ပူစရာမရှိတော့ဘူးပေါ့။
ရေ - မီး အိမ်သာ အပြည့်အစုံ။
ခရီးသည်များ တစ်ဦးနှင့်တစ်ဦး ပူးကပ်ပြီး ထိုင်စရာမလို။
ခရီးလမ်းတလျှောက်လုံးကားစီးရသလို မလှုပ် မယှက်
ပုံစံထိုင် ထိုင်ပြီး လိုက်စရာ မလို။
ခြေလက် ထုံကျင် ညောင်းညာစရာ အကြောင်း မရှိ။
ဘေးအန္တရာယ် အတွက် ဘုရားဂုဏ်တော် တရားဂုဏ်တော် အထပ်ထပ် ရွတ်နေစရာ မလို။
စိတ်ချလုံခြုံမှု အပြည့် ရှိပြီးသား ဖြစ်တယ်။
ဒါပေမဲ့ မမကို တခုသတိပေးချင်ပါသည်။
ခရီးသည် အသွားအလာများလာလို့ လက်မှတ် မရောင်းရသေးဘူး ကုန်
ပြီဆိုတဲ့ စာတမ်းလေးတော့ မမြင်ချင်စေချင်ဘူးဗျာ။
ဝင်ချိန် ထွက်ချိန်လေးလည်း တန်ဘိုးထားပေးပါ။
ပြေးဆွဲချိန်ကို ယခုအချိန်ထက် ဖြစ်နိုင်လျှင် လျှော့ချပေးစေချင်တယ် ။
ဈေးသည်ယောင်ယောင် အလုပ်သစ်သမား(အလစ်သုတ်) များလည်း ဖယ်ရှားပေးပါ။
စည်းကမ်းများလည်း အစကကောင်းသလို နောင်လည်း ကောင်းစေချင်
ပါတယ်။တင်းကြပ်စေချင်ပါတယ်။
ဘာဘဲဖြစ်ဖြစ် ကျုပ် ကတော့ အားလျှင် အားသလို
ကောလင်းကို RBE ရထားစီးပြီး အထပ်ထပ် အခါခါ
လစ်ပြီးပြန်တော့မယ်ဗျို့။
ကဲ လိုက်ကြမလားဗျာ။
စားစရာ သောက်စရာ နေစရာ ထိုင်စရာ။
ဘာမှမပူနဲ့,,,,။ ပိုက်ပိုက်တော့ ယူခဲ့ပေါ့။
ကိုယ့်စားရိတ် ကိုယ်စား။ ကိုယ့်နွား ကိုယ်ကျောင်းပေါ့ဗျာ။
No comments:
Post a Comment